قصه هو وهي

بسم الله الرحمن الرحيم

اليوم اريد اقول لكم قصة كتبتها بنفسي لكن يمكن تصير ف واقعنا وفي مجتمعاتنا...هذي القصه تتكلم عن زوج و زوجه ( طبعا راح أكتبها بالعاميه و عاد تحملوا يعني مشيوا الحال هع)

((هي)):.....
معتزه بنفسها ... مستقله... تحب تسوي ألي فراسها...من عائله غنيه شوي..كل طلباتها مجابه حتى قبل لا تطلب الشئ تشوفه قدامها... مبذره تشتري بدل الشئ شيئين... و تفصل من الملابس بدل الوحده 3 او 4 ..و عايشه على هذا المنوال يعني تسرف في أستخدام المال بدون حتى ما تفكر كيف جا و وين بيروح
تحلم بفارس أحلام يقدر يعيشها في حياه ما تحلم فيها اي بنت ... حياه مليئه بالرفاهيه و الحب و الرومانسيه و غيره كثير...
(((هو)))::.......

انسان متواضع... عنده وظيفه تقدر تعيشه هو واهله (طبعا هو المسؤول عنهم بعد وفاة ابوه)... بعيد كل البعد عن التبذير ... الفلوس ألي يحصلهن موزعه و مقسمه بدقه بحيث تسد كل أحتياجاتهم و يقدر يوفر منها شوي...

في يوم من الايام شافها... عجبته..عجبه جمالها و رشاقتها وبس وما فكر في أي شي ثاني .. المهم حب يعرف كل شي عنها... ما خلا أحد الا و سأله عنها ..عن أبوها..نسبها.. عائلتهاوكل شي تقريبا...

(((هو))):....

أريدها ولازم أتزوجها..( يا رجال هون.. كيف تتزوجها؟!!!!... ما تعرف من هي و كيف عايشه!!!)
أعرف كل شي عنها .. وأعرف انها دلوعه لكن أنا متأكد أني أقدر أغيرها.. أصلا أنا عارف أنها بتقدر ظروفي و بتساعدني.. وهي بنت و البنات بسرعه يتغيرن وأنا بقدر أأثر عليها....

(((هي))):.....
( سمغت فلان الفلاني تقدم لك (صديقتها ))...بأبتسامه خجوله ... أصلا انا عارفه انه بيجي يخطبني ملاحظه من زمان عليه انه يشوف علي ...( و شو رايك؟) أمممم ... اريده لأنه بصراحه حلو و وسيم و الباقي ما يهمني..( الله يهديك من صدقك تتكلمي؟!!!!!) أنا موافقه و أنا حره وما بغير رأيي.....

( كل واحد فكر بسطحيه ...ما نظر للوضع نظره مستقبليه.. وكان اختيارهم مبني على اساس واحد وبس ... وهذا ألي صار)..

((( الملكه))):....

صارت الملكه.. و الكل راضي و مستانس و فرحان... مشى ألي يريده .. و تحقق لكل واحد منهم حلمه...و عاد ما تخفى عليكم المكالمات... و التخطيط للمستقبل و غيره..
بيكون عندنا بيت
و بنجيب أولاد
و بنعيش أن شالله مرتاحين و الكل راح يحسدنا على عيشتنا
أن شالله


(( و اذا جينا نشوفهم بعد الزواج بفترة)))

((( هو))):....

مسرفه... مبذره... ما تراعي ظروفي و مكانتي على بالها بعدها عايشه عند أبوها...ألع من البيت الصبح ما متريق .. و أرجع البيت ما أحصل غدا..واجد تنام...ما تهتم بأولادها... و كله بس طالعه واذا سألت وين رايحه بيقولوا السوق ولا مع صديقاتها... حشااا والله هذي ما عيشه..

( ما أنت كنت عارف أنها كذا... و عارف كل طباعها و تصرفاتها ... حد جبرك تتزوجها)

(((هي))):....

ما يخليني أسوي ألي أريده...و يمشيني على كيفه.. أنا فلانه الفلاني يقول لي ما تشتري واجد و قللي من طلعاتك و أهتمي في بيتك... أصلا أنا أهلي ألي هم أهلي ما فيوم من الأيام قالولي سوي وما تسوي جاي هو على آخر زماني يتحكم فيني...
عجب عناد فيه راح أسوي ألي في راسي ... وما أكون مثل ما يريدني يعني هو ذل ولا ذل...

( انت من البدايه عارفه عنه و عن وضعه ليش وافقتي تتزوجيه؟))

كل ما تمر الايام تزيد المشاكل أكثر وأكثر... هي ما قادره تتأقلم مع وضعها الجديد .. أنا شو جابني هنا... أنا وين وهذي الحياه وين... شو نفعني أنه وسيم وحليو( الندم يوم لا ينفع الندم).. تغيرت حياتها 180 درجه عن الحياه في بيت أبوها... و صارت تثقلها الهموم و التعب من وضعها الجديد ... مسؤوليه فوق طاقتها ... يعني صدمه من الحياه بدون اي مسؤليات ألى حياه كل ما تتحرك فيها الى جانب لازم تكون فيه مسؤوله وهي ما قد هذا الشي كله...عاد ألحين لازم أتحمل نتيجه أختياري...

تحطمت حياته هو... كل ألي بناه في حياته راح.. وكل أحلامه في بيت سعيد و عائله متفاهمه تبخر و طار أدراج الرياح... أنا مني السبب ... قلت بتتغير لكن ما تغيرت .. أنا ألي طيحت نفسي في هذي المتاهات ولازم اتحمل...

في النهايه عاش كل من هو وهي تحت سقف بيت واحد لكن كل واحد فيهم له عالمه الخاص و يجامل الثاني علشان تمشي حياتهم و علشان أولادهم ألي ما لهم ذنب ف هذا كله ... فهم الضحيه الوحيده اذا صار انفصال بينهم...

........... النهايه.........

من هذا كله اريد أول معلومه وحده وبس .... الأختيار المناسب لزوج لأو الزوجه هو الاساس .. و هو الي يحدد هل سيستمر هذ الزواج بسعاده ولا راح تكون نهايته مثل قصه هو وهي

تقبلوا تحياتي .. دوم مبتسمه

؟؟؟؟؟؟ على الاقل قولوا ما حلوه

صحيح القصة كثير تمس واقعنا...
والمفروض القابلين على الزواج يختاروا بعضهم بدقة(بالعقل والقلب معآ)
قال حب من أول نظرة قال